פרק קודם, הבשורה הקדושה על-פי מתי, הברית החדשה

הבשורה הקדושה על-פי מתי פרק כח

כח   ואחרי מוצאי השבת כשהאיר לאחד בשבת באה מרים המגדלית ומרים האחרת לראות את-הקבר: 2 והנה רעש גדול היה כי-מלאך יהוה ירד מן-השמים ויגש ויגל את-האבן מן-הפתח וישב עליה: 3 ומראהו כמראה הברק ולבושו לבן כשלג: 4 ויבהלו השמרים מפחדו ויהיו כמתים: 5 ויען המלאך ויאמר אל-הנשים אתן אל-תיראן הן ידעתי כי את-ישוע הנצלב אתן מבקשות: 6 הוא איננו פה כי-קם כאשר אמר באנה וראינה את-המקום אשר שכב-שם האדון: 7 לכנה מהר והגדתן לתלמידיו כי קם מן-המתים והנה הוא הולך לפניכם הגלילה ושם תראהו הנה אמרתי לכן: 8 ותמהרנה ותצאנה מן-הקבר ביראה ובשמחה גדולה ותרצנה לספר אל-תלמידיו: 9 הנה הלכות לספר אל-תלמידיו והנה ישוע נקרה אליהן ויאמר שלום לכן ותגשנה ותאחזנה ברגליו ותשתחוין לו: 10 ויאמר אליהן ישוע אל-תיראן לכנה והגדנה לאחי וילכו הגלילה ושם יראוני: 11 ויהי בלכתן והנה אנשים מן-המשמר באו העירה ויגידו לראשי הכהנים את כל-הנעשה: 12 ויקהלו עם-הזקנים ויתיעצו ויתנו-כסף לרב אל-אנשי הצבא לאמר: 13 אמרו-נא כי-באו תלמידיו לילה ויגנבו אותו ואנחנו ישנים: 14 ואם-ישמע הדבר בית ההגמון אנחנו נפיסהו ואתם אל-תיראו: 15 ויקחו את-הכסף ויעשו כאשר שמו בפיהם ותצא השמועה הזאת בין היהודים עד היום הזה: 16 ועשתי עשר התלמידים הלכו הגלילה אל-ההר אשר אמר להם ישוע: 17 ויראו אתו וישתחוו-לו ויש מהם אשר חלק לבם: 18 ויגש ישוע וידבר אליהם לאמר נתן-לי כל-שלטן בשמים ובארץ: 19 ואתם לכו אל-כל-הגוים ועשו תלמידים וטבלתם אתם לשם-האב והבן ורוח הקדש: 20 ולמדתם אתם לשמר את-כל-אשר צויתי אתכם והנה אנכי אתכם כל-הימים עד-קץ העולם אמן:

הבשורה הקדושה על-פי מרקוס, הבשורה הקדושה על-פי מתי, הברית החדשה