פז לִבְנֵי־קֹרַח מִזְמוֹר שִׁיר; יְסוּדָתוֹ, בְּהַרְרֵי־קֹדֶשׁ׃
2 אֹהֵב יְהוָה שַׁעֲרֵי צִיּוֹן; מִכֹּל, מִשְׁכְּנוֹת יַעֲקֹב׃
3 נִכְבָּדוֹת מְדֻבָּר בָּךְ; עִיר הָאֱלֹהִים סֶלָה׃
4 אַזְכִּיר רַהַב וּבָבֶל, לְיֹדְעָי הִנֵּה פְלֶשֶׁת וְצוֹר עִם־כּוּשׁ; זֶה, יֻלַּד־שָׁם׃
5 וּלֲצִיּוֹן יֵאָמַר, אִישׁ וְאִישׁ יֻלַּד־בָּהּ; וְהוּא יְכוֹנְנֶהָ עֶלְיוֹן׃
6 יְהוָה, יִסְפֹּר בִּכְתוֹב עַמִּים; זֶה יֻלַּד־שָׁם סֶלָה׃
7 וְשָׁרִים כְּחֹלְלִים; כָּל־מַעְיָנַי בָּךְ׃